அக்டோபர் 23, 2018: எபேசியர் 2:12-22; லூக்கா 12: 35-38
தேர்வு பயம் போலவே பலரை இறுதி தீர்வு பயமும் ஆட்கொண்டுவிடுகிறது. அதை நாம் எப்படி எதிர்கொள்வது?
நேற்று வாழ்வு என்னும் கொடையை குறித்து சிந்தித்தோம், இன்று மற்றொரு சிறப்பான கொடையை குறித்து சிந்திக்க அழைக்க படுகிறோம்... நமது அடையாளம்! ஆம் வாழ்வு என்னும் கொடையை நாம் கேட்காமலே நமக்கு வாரிவழங்கியுள்ள இறைவன், நமக்கென ஒரு அடையாளத்தையும் கொடையாய் தந்துள்ளார். அவரது உருவையும் சாயலையும் தாங்கியவர்களாய், அவரது மக்கள், அவரது பிள்ளைகள், அவரது மகன், மகள் என்ற அடையாளத்தை நாம் பெற்றிருக்கிறோம். இந்த அடையாளம் நம் மனதில் ஆழமாய் பதிந்திருந்தால், ஒவ்வொரு நாளும் இதற்கு தகுதி உள்ளபடி வாழ நாம் முனைப்பாய் இருந்தால், நமது அன்றாட வாழ்வின் செயல்கள் முடிவுகள் அனைத்தையும் இந்த அடையாளத்திற்கு தகுதியுள்ளவைகளாய் நான் தெளிந்து தேர்ந்தால், நான் ஏன் இறுதி தீர்வை கண்டு அஞ்ச வேண்டும்?
நான் ஒவ்வொரு நாளும் மேற்கொள்ளும் எனது முடிவுகள் எனது தேர்வுகள் ஒவ்வொன்றையும் எனது அடையாளத்தை மனதில் நிறுத்தி நான் மேற்கொண்டேன் என்றால், எனது சொல்லும் செயலும், வாழ்வும் வாக்கும், உள்ளமும் உறவுகளும் எனது அடையாளத்திற்கு ஏற்ப இருந்தது என்றால், நான் இறப்பை குறித்தோ, இறுதி தீர்வை குறித்தோ எந்த கவலையும் கொள்ள வேண்டியதில்லை.
ஒவ்வொரு நாளும், ஒவ்வொரு நிமிடமும், ஒவ்வொரு நொடியும் இறைவனின் அன்புமிக்க பிள்ளைகள் என்ற நமது அடையாளத்திலிருந்து தவறிவிடாமல் நாம் வாழும்போது... தேர்வோ தீர்வோ, எதைக்கண்டும் நாம் அஞ்சவேண்டாம்!
No comments:
Post a Comment