ஏப்ரல் 24: அவரது மக்களாக சில வழிகள்

2. அவரது கைவன்மையை காணுங்கள் 

ஆண்டவரின் கைவன்மையை அவர்கள் பெற்றிருந்தார்கள், என்று திருத்தூதர் பணி இறைவனின் மக்களை குறித்து நமக்கு கூறுகிறது. கிறிஸ்துவோ, தன் மந்தையை சேர்ந்தவர்கள் தன்னை அறிந்திருப்பார்கள், தன் கையிலிருந்து அவர்களை யாரும் பறித்துக்கொள்ள இயலாது என்று கூறுகிறார். நமது ஆபத்தான வேளைகளிலோ, இருள் சூழ்ந்த பொழுதுகளிலோ, இறைவனின் கைவன்மை, அவரது பாதுகாக்கும் கரம் நம்மோடு இருப்பதை நாம் உணரவேண்டும்.

கடவுளோடு இருந்து என்ன பயன், என் வாழ்வில் ஏன் இத்தனை துன்பங்கள்? அவருக்கு உண்மையுள்ளவனாய் உள்ளவளாய் இருந்ததற்கு அவர் தரும் வெகுமதி இது தானா, இது ஏன் எனக்கு நிகழ வேண்டும்? என்றெல்லாம் கேள்வி கேட்போரை எவ்வளவு எளிதாக காணமுடிகிறது... உண்மையிலேயே நாம் அவரது மந்தையை சார்ந்தவர்கள் என்றால் எந்த நேரத்திலும் நாம் அவரது கைவன்மையை காண தவற கூடாது. 

இக்கட்டான நேரத்திலும், இருள் சூழும் பள்ளத்தாக்கிலும், இறப்பின் வேளையிலும் கூட அவரது கைவன்மை நம்மை சூழ்ந்தபடியே உள்ளது என்பதை நாம் உணரவேண்டும் - அப்போது மட்டுமே நாம் அவரது மந்தையின் மக்களாகிறோம், அவரது மக்களாகிறோம்!